Sjtadsprins 2018 BRIAN I (Beckers)

Brian

Brian Beckers is op woonsdig 10 januari 2018 tiedens de traditionele revue Gelaen Waggelt in 'n tot de nok gevulde Hanenhof oetgerope tot 71ste Sjtadsprins van Gelaen. Hae geit de Waereldsjtad dit jaor tiedens de vastelaovesdaag regeren es BRIAN I.
Brian is gebaore en getaoge in de Waereldsjtad en is verknoch aan vastelaovend. Al väöle jaore löp hae de optoch mit, mit 't ganse gezin en de res van de femilie Beckers. Brian haet zelfs al 'n veurganger in de familie; zien naefke Jelle waor in 2013 de 55ste Sjtadsjeugprins van De Flaarisse. De residentie van Brian sjteit aan de Riekswaeg Zuid in de wiek Kraonkel.
Mèt  de oetroping tot Sjtadsprins van De Flaarisse geit ein lang gekoesterde druim van Brian in vervulling. Zien insjtallatie tot 71ste Sjtadsprins waor 't sjloetsjtuk van 'n hartveroverende Revue Gelaen Waggelt, dae zich opnuuj aafsjpeelde op de tot kafée bie Zef en Mai omgeboewde bühne van de Hanenhof.
Eerder op de aovend waor al aafsjied genomme van Sander (I) Klinkers, dae vervolges woort opgenomme binne de Sociëteit Awt Prinse (SAP).
Sjtadsprins BRIAN I en sjtadsjeugdprins TIJMEN I Cremers hawte zondig 14 januari vanaaf 11.11 oer receptie in de Hanenhof.

De liefsjpreuk wo mit  BRIAN I 't Flaarisse-riek geit regere luud:

Feës gezellig mit mich mit,
Daovan krit geer geine sjpiet,

Waereldsjtad laot van uch heuëre,
dan besjteit Gelaen veur altied.

Gelaen alaaf !

Deel deze pagina