7 x 11 JAOR FLAARISSE
't Is dát biezunjere laevesgeveul dat twelf wieke en buurte verbènjd: de Waereldsjtadvastelaovend. Saer 1947 maak de georganiseerde vastelaovend integraal deil oet van de Gelaense identiteit. 7 x 11 jaor SVV De Flaarisse sjteit veur bónte sezoene, talrieke gesjminkde gezichte, ontelbare kestuums en nog väöl meë sjlok, oetbunjige zittinge en de sjoanste vastelaovesoptochte. Mèr 't sjteit ouch veur ein väölvoud aan vereniginge, vriewilligers, muzikante en vastelaovesvierders, die allemaol ein sjtökske biedrage aan dit prachtige volksfeës dat veer van 11 november pès Esjelegoonsdig viere.
ÓS WAERELDSJTAD VLAMT
De 77ste verjaordig van Sjtadsvastelaovesvereniging De Flaarisse is neet allein ein groat feës veur de vereniging, mer baovenal eine veur gans de Waereldsjtad. Tensjlotte is jedere Gelaendenaer eine flaarin of flaaris. Daoróm wille veer gaer dit biezunjere jubileumsezoen same mit uch viere: de Vief van Gelaen, ózze Flaarisse-femilie, alle bevrunje (parapluuj)vereniginge en alle luuj van ós Waereldsjtad (en wied dao boete).
Dat doon veer ónger 't jaorthema: 'Ós Waereldsjtad Vlamt', wobie veer uch ein utesj gevarieerd en oetbunjig vastelaovesprogram prizzentere. Zoa brènge veer de vastelaovend - zoa wied geer van ós gewènd zeet - kort bie de luuj, koestere veer ózze tradisies en gaeve veer de 'vlam' door.
JUBILEUM HÄÖGTEPUNTE
Op 11 november äöpene veer tradisiegetroew mit eine dialekmès, gevolg door 't eësjte groate hoagtepunt van ós jubileum: de Gulden Humor Feësaovend. Ein groats feës in Glanerbrook ter eëre van 7 x 11 jaor Waereldsjtadvastelaovend en wobie ouch de oetreiking van de Orde van de Gulden Humor aan dhr. Theo Bovens plaatsjvintj. In de dao-op volgende maonje zulle o.a. de oetroping van de Jubileumsjtadsprins en Sj tadsjeugprins, ein jubileum Prónkzitting, konsèr en optochte, de Gelaender toer, tentoonsjtellinge en aktiviteite de väöle facette van ózze vastelaovend kleur gaeve.
03-11-2023 GVK Finale
11-11-2023 Vastelaovesmès + Äöpening 11e van de 11e
24-11-2023 Buutesjpas ('t Senaat)
25-11-2023 Gulden Humor + Gulden Humor Feësaovend
05-01-2024 Nach van de nuje Sjtadsprins
07-01-2024 Kènjerzitting mit oetroping Sjtadsjeugprins
12-01-2024 Resepsie Sjtadsprins & Sjtadsjeugprins
17-01-2024 Sjoenkeltreffe
20-01-2024 Jubileum Prónkzitting
02-02-2024 7x11 jaor Waereldsjtadvastelaovend Reünie
03-02-2024 Opwermrepetisie + Oetreiking optochnummers
03-02-2024 Klassjenere (SAP)
04-02-2024 Vlagheise bie Sjtadsprins (RAAF)
07-02-2024 Vlagheise bie Sjtadsjeugprins (SJPAS)
08-02-2024 Vastelaoveskonsèr Philharmonie zuidnederland
10-02-2024 Intoch Sjtadsprins + Sjleuteleuverdrach (Besjlaote evenement)
:
11-02-2024 Groate Waereldsjtadoptoch & priesoetreiking
12-02-2024 Waereldsjtad Kènjeroptoch & priesoetreiking + Groat Waereldsjtad Kappelle Konkoer (Oete Waeg)
13-02-2024 Lètste aovendmaal + Sjleeting Waereldsjtad- vastelaovend 2024
november 2024 7x11 Jubileum Resepsie
GULDEN HUMOR FEËSAOVEND
Op zaoterdig 25 november 2023 viere veer same mit uch 7 x 11 jaor Waereldsjtad-vastelaovend in Laco Glanerbrook. Geneet van ein eësjteklas program mit ónger angere de kölsche topband Die Klüngelköpp, Don Kiesjot, Toddezèk, Tanzcorps Colonia Rut Wiess, Richtig Rex, Hoondervel en Spik & Span.
JUBILEUM PRÓNKZITTING
Dat luuj in aovendkleijer gein sjpas en plezeer kènne make, besjouwe veer es groate kwatsj. Belaef op zaoterdig 20 jannewari 2024 't ultieme vastelaoves geveul te midde van De Flaarisse. Veer prizzentere uch ein utesj gevarieerd en exclusief program veur jónk en awd, mit artieste van internationale allure.
Pès de Gulden Humor Feësaovend
JUBILEUM SJTADSPRINS
"Caudillo van Sjpaans Nirbik, Ridder van de aafgegrave Sjtein-berg, Kanseleer van Lutterao en Vorst van Danike...", zoa mer ein greep oet de väöle titels dae ózze 77e Jubileumsjtadsprins van de Waereldsjtad zal maoge veure. Wae geit veur ós in dit biezunjere sezoen veurop? Op vriedig 5 jannewari 2024 zal veer 't weite, tiejes de Nach van de nuje Sjtadsprins.
DE FLAARISSE
Ut belangriekste doel van Sjtadsvastelaovesvereniging De Flaarisse is ut organisere, oetdrage en wiejer ontwikkele van de vastelaovend in de Waereldsjtad Gelaen. Dit in 'ne balans van sjpas, plezeer, óngerling respek en samewirking op ein waerdige meneer.