GELAENSE VASTELAOVES 
PEKSKESBAZAAR

Wae in Gelaen - of dao boete - op zeuk is nao ein originele (tweedehands) vastelaovesoutfit kènt ouch dit jaor weer terech bie de Gelaense Pekskesbazaar van de Flaarinne. Saer 2005 runne de dames van Sjtadsvastelaovesvereniging De Flaarisse de "Pekskesbazaar" oppe Salmsjtraot 50, in 't centrum van de Waereldsjtad. Dit jaor belaef 't verzamel- en verkouppunt van vastelaoveskleijer, heudjes en accesoires häör 20ste edisie. Wat oaijt begoosj es ein lokaal initiatief is oetgegruijd pès ein Euregionaal sukses, mit ein driedoezend kostuums tellende kolleksie. 

Ut idee is simpel: ein team van vriewilligers nömp mit alle leefde vastelaovespekskes euver om dees weer ein tweede laeve te gaeve, door ze wiejer te verkoupe aan vastelaovesvieders die hie nao op zeuk zeen. Alle kleijer zeen zuver en prima in orde. Twee derde van de opbrèngs is veur de persoon dae 't pekske verkoup en ein-derde is besjtömp veur De Flaarisse. De sjtadsvastelaovesvereniging financiert daomit tal van aktiviteite veur de Waereldsjtadvastelaovend.