REGIMENT AWT ADJUDANTE FLAARISSE
In 1987 introduceerde De Flaarisse ein nuuj tradisie bènne de Waereldsjtadvastelaovend, 't fenomeen 'Adjudante'. En mit sukses! Sear dat jaor wurt de Sjtadsprins van Gelaen onaafgebraoke vergezeld door twee Adjudante, dae de Sjtadsprins op eine enthousiaste en betrokke meneer óngersjteune bie 't vervulle van zien regeersjap. Ze bereide openbare optreijes veur en beeje óngersjteuning bie seremoniële momente. De Sjtadsprins maog zien Adjudante zelf oetkeeze, meistal vrunj of femilieleeje die mekaar geweldig good aanveule.
Ut ‘Regiment Awt Adjudante Flaarisse’ (aafgekort R.A.A.F.) is ein klubke, dat is opgerich in 1996 óm deze awt adjudante te verenige. Ut Regiment haet es doel de viering van de Waereldsjtadvastelaovend in eëre te hauwte.
Oprichting RAAF
Ut waor op ’t lètst van de zomer van 1996, dat enkele ex-adjudante veur ut eësj biejein kwaome. Destieds nog bie Café Bertha oppe Riekswaeg Noord. Veer es Awt Adjudante woorte dao oetgeneudigd op initiatief van De Flaarisse en enkele leeje van de Soosjeteit Awt Prinse (SAP).
Ut doel van dae biejeinkomst waor om ens te bekieke of d'r ein klubke geformeerd koosj waere van Awt Adjudante. Mit es veurnaamste doel ut opvange van de adjudante die jeeder jaor aaftreeje in de Hanenhof. Daobie waore de Flaarisse op zeuk nao ein klub dae interesse hauw om ut traditionele vlaghijse bie de Sjtadsprins te organiseere. De Buuleblaozers, die dit jaore gedaon heije, wilde gear ’t sjtekske euver gaeve. Nao drie vergaderinge waor ut dan zwao wied: ’t RAAF waor gebaore.
Ut eesjte jaor sjtóng veural in 't teike van veul algemeine en praktische zake om ’t RAAF vorm en inhoud te gaeve. Gelökkig waor d’r väöl hulp bénne ut Gelaense. Zo teikende o.a. Ruud van Wersch ós logo, wat veer noe nog ummer gebroeke. Naodat veer alles zo’n bietje geregeld hauwe, ginge veer es 'greun' vereniging de vastelaovend in. Veer belaefde ein fantastisch sezoen, mèt es häögtepunt ós eësjte vlaghijse biej Sjtadsprins Hans 4e Lemmens. 't Sezoen waor gesjlaag en de basis veur 't RAAF waor gelag!
Inmiddels höbbe veer twee jubilea (van jeeder 11 jaor) achter de rugk en is 't RAAF ein enthousiaste Awt Adjudante vereniging, mèt meë es 30 aktieve leeje. De aafgeloupe jaore höbbe veer väöl nuuj leeje maoge begroete. En kènne veer boewe op de inzèt van jeederein en de sjteun van alle Gelaense vastelaovesgèkke.