GROATE WAERELDSJTADOPTOCH
& KÈNJEROPTOCH
De Groate Waereldsjtadoptoch is ongetwiefeld ut häögtepunt van jeder vastelaovessezoen. Jaor nao jaor verwonjert de optoch weer de väöle doezende vastelaovesgekke en bezeukers langs de kant van de waeg, mit bontje, de meist ludieke & oetbundige kreasies. Mit meë es 111 deilnömmers bleuijt de Waereldsjtadoptoch volop bie jóngk en awt.
Rieke gesjiedenis
De huidige Groate Waereldsjtadoptoch maak óngerdeil oet van eine rieke gesjiedenis, dae gans lang trökgeit. Ut eësjte berich van 'ne carnavalsoptoch in Gelaen, is te vènje in 'ne advertensie in ut blaad 'Limburg' van 23 fibberwari 1895. Dao woort veur vastelaovesmaondig om 12:11 oer eine optoch aangekondigd oppe Kraonkel. Wae de optoch organiseerde is neet bekend, mèr d'r woort oetgeneudigd namens 'ut besjtuur'.
Ein eësjte optoch nao de Tweede Waereldoorlog goof ut zich in 1948. Jean Janssen hauw toen de eër óm es eësjte Gelaense Sjtadsprins ‘t vastelaovesezoen veurop te gaon, mèr eine richtige 'vastelaovesoptoch' zaot nog neet d’r in. Toch koosj Jean I zich in augustus van dat jaor aan ‘t Gelaense publiek veursjtèlle in eine historische sjtoet bie gelaegeheid van et 50 jaorig regeringsjubileum van Keuningin Wilhelmina.
Waereldsjtadoptoch 2025
"Doog mit, gaef door, gaef 't wiejer dat 't noajts zal euvergaon!" Oeteindelik make veural de deilnömmers de optoch en hawte zie deze tradisie in eëre. De Groate Waereldsjtadoptoch zal dit jaor op zóndig 2 meërt 2025 vanaaf 13:49 oer door de Waereldsjtad trèkke.
Nao aafloup van de Waereldsjtadoptoch zal door de Optochjury de bekèndmaking van de optoch-winnaars plaatsvènje in de Hanenhof. Sjus wie 't tradisionele oetreike van de Jean Janssen Wisseltrofee door de Opperflaaris.
Deilnömmers kènne häör optochnummer ophaole op zaoterdig 22 fibberwari 2025 tössje 15:30-18:00 oer in Café de Kroon aan de Roadhoessjtraot 31. Insjrieve leefs veuraafgaond aan oetreike optochnummers, mer insjrieving blief meugelik t/m goonsdig 26 fibberwari 2025.
Via ongersjtaonde links (scroll verder nao beneeje), kent geer uch insjrieve, de optochroute bekieke en 't optochrreglement raodplege.
Höb geer nog twiefels euver uche deilname? Of óntbrik ut nog aan kolderike inspirasie? Nöm dan gerös kontak mit ós op
Ouch veur vraoge / opmerkinge kènt geer uch melde bie de Optochkemissie o.l.v. Ivo Spanjaard,via: optocht@flaarisse.nl.
Kènjeroptoch: Doog mit, Gaef door!
Speciale aandach veur de "Doog mit, Gaef door optoch" op vastelaovesmaondig. Loup geer ouch in dizze intieme optoch door 't centrum, al dan neet mit ein anger kreasie mit?
Oppe vastelaovesmaondig trèkke vanaaf 14:11 zo wie vannouds de jeugprinse en jeugprinssesse mit hun gevolg door de sjtraote van 't centrum van Gelaen. Deze Kènjeroptoch höbbe de Flaarisse, geïnspireerd door de 't hitnummer van de SAP omgeduip tot de "Doog mit, Gaef door optoch". Deze optoch is namelijk neet allein mer op de jeug gerich mer ouch op ederein dae dat sjoane vastelaovesgeveul aan ein volgende generasie of aan nuje inwoners van de Waereldsjtad wilt doorgaeve.
Loup dus, es einzelgänger, duo, kleine of groate groep mit, en laot zeen wie en aan waes te de vastelaovend doorgaefs! Opa of oma mit de kleinkenjer, nónk en tant mit 't naefke of nickske, 4 generaties, meister en juffrouw mit de klas, de sportcoach mit 't team, same mit ein vrundj of vriendin van boetlandse aafkomst, of eine awt prins mit ziene awt jeugprins. Of dreij 't om en loup mit, mit degene dae dich oajts de vastelaovend mit de paplaepel haet ingegaeve. Num opa of oma (es dat neuëdig is in de rolsjtool), de mam of pap nog eins mit om same nog eins de optoch te loupe.
Daobiej is d'r oetgebreid ruimte veur leuke kreatieve ideeje die zonger al te väöl veurbereidinge op 't letste moment nog ineingesjteeld kènne waere. Dat thema maog natuurlik van alles en nog get zeen en hoof op zichzelf gein oetdrukking te gaeve aan 't doorgaeve van de vastelaovend.
Insjrieve veur de "Doog mit, Gaef door optoch" kent ouch digitaal via 't formuleer op ozze vernuujde website of oppe daag zelf vanaaf 13.00 oer bie cafe De Vlaegel.
De route van de Doog Mit Gaef door optoch is:
Opsjtelle Graaf Huynlaan - Oude Markt (1ste doorkomst langs 't Cornerhouse) , Raadhuisstraat, Salmstraat, Gravenstraat of Groenstraat, Nieuwe Markt, Elisabethstraat achterlangs Stadswinkel richting Bernhardstraat richting Graaf Huynlaan, Oude Markt (2de doorkomst langs Cornerhouse), ontbènjing in Raadhuisstraat / Salmstraat
Trökblik 2024
Wat waor 't ein fantastische Waereldsjtadoptoch! 'T raegende sjlòk, konfetti en sjokkelaad! Veer höbbe van jedere minuut genaote. Bedánk aan jeederein dae biegedrage haet aan dizze biezunjere daag!